十一月股息

過兩日收埋盈富基金果九百蚊股息，今個月會收到 $950 股息。

由於領匯提早十二月中就派息，所以下個月收埋領匯同宏利股息後，應該要餓息兩個月到 2014 年 3 月宏利派末期息時先再有股息收入了…(第三次中期息未到手已經望緊末期息，so sad... )

既然今年股息收入已大概確定，順便幫自己今年既股票收入做個總結：

2013 總股息收入：應該差少少有萬八，單月最高股息有九千蚊 (七月)
總期權金收入：約二萬四至二萬六，已計入因SP/SC行使價所導致的盈利/虧損。
最失敗交易：十月底 SC 6手11 月平保 @ 62.5，好彩係 covered call，只係賺少左(超過一年期權金收入！嗚！)

十一月月供

又再一次月供完成後大跌，睇黎月供呢樣行動可以帶黎一個投機機會... 如於月供前兩日收市前半小時入 call，月供日午市前平倉兼開 put，月供日翌日午市前平倉…研究下先…


今個月月供約二萬蚊，除左中石油、交銀同電盈外，其他月供股票都已經擺脫潛艇行列... 早排減持左接近一半既宏利更加係比平均買入價升左三成以上…但由於早前期權接貨既平保同港交所繼續潛水而IPO 抽到既安徽銀行同重慶銀行雙雙破發，所以唔計股息及權金收入的話，以今天收市價計，成個倉係微蝕緊 2%，跑輸大市。

(計埋股息同權金就好 d ，回報有 9.5%…)


另外，十一月到今日依然無開過期權，感覺上跌既機會大過升，但在無心水既情況下，寧願唔玩住…

IPO

入左飛抽兩隻新股 (又係銀行股)，睇黎我對金融股真係有情意結！

不過除左公司可以經 IPO上市之外，有無諗過將自己上市呢？美國網站 upstart.com係一個由包括前谷歌總裁 Dave Girouard 等人創辦的網站，讓有意者 (upstarts) 以未來十年的部份收入換取投資者(backers) 資金。現時絕大部份的 upstarts 都是剛畢業的大學生，所慕集既資金以償還學生貸款及創業為主。而除了能夠獲取資金外，upstarts 亦都可以向 backers 尋求專業意見，由於 upstarts 既成功會直接影響 backers 所作的投資回報，backers 亦因此樂意提供協助。

但為左集資，有人可以去得更盡！Michael Merrill 在零八年一月將自己分成十萬股並以一美元一股既價格將自己上市！而所有股東更可以在其獨立的平台上買賣股份並投票決定其動向，包括工作，愛情，甚至乎他應否做輸精管切除手術 (vasectomy)都交由股東決定！

Michael 呢個創新嘗試連知名網站 wired.com 都係今年三月做左一個專題報導
(http://www.wired.com/business/2013/03/ipo-man/all/) ，而如果有興趣買賣這隻(這位？) Michael 的股票，可前往 KmikeyM.com 登記，根據網站已登記股份，現時只需要獲得 2623 股，就可以得到 Michael 既控制權 (Michael 自己持有的股票並沒有投票權)！以其現價 ~10美元一股計(五年十倍回報！)，二十萬左右就可以控制一個人的行動，其實真的有點恐怖...